Ալեն Սիմոնյանի բերած նախագիծը խայտառակություն է․ թող ուղղակի իշխանական ֆեյքերը փակեն․ Զոհրաբյան

Այսօր՝ խորհրդարանական ճեպազրույցների ընթացքում «Բարգավաճ Հայաստան» խմբակցության պատգամավոր Նաիրա Զոհրաբյանը խայտառակ որակեց Ազգային ժողովի փոխնախագահ Ալեն Սիմոնյանի նախագիծը, որով վիրավորանքի և զրպարտության համար նախատեսվում է ավելացնել փոխհատուցման չափը:
«Սա ես համարում եմ աննախադեպ խայտառակ օրինագիծ, այն ուղղված է խոսքի ազատության դեմ, այս օրինագիծը ուղղված է Հայաստանում ազատ խոսքը լռեցնելու դեմ, և այս օրինագիծը բնավ ուղղված չէ վիրավորանքի և զրպարտանքի դեմ»,-ասաց նա:


Ըստ պատգամավորի՝ այդ օրինագծով նախատեսվող փախհատուցման չափը անտրամաբանական և անհամաչափ: «Եթե իշխանությունները ցանկանում են Հայաստանում վերացնել վիրավորանքը, զրպարտանքը, ատելության խոսքը, հայհոյանքը, զազրախոսությունը, ապա դա Նիկոլ Փաշինյանից պահանջելու է ընդամենը 2 րոպե ժամանակ: Փակվում են իշխանական ֆեյք ինուստրիան, փակվում է իշխանական ֆեյք ինկուբատորը, և դուք կտեսնեք, որ Հայաստանում շնչելը կլինի շատ ավելի ազատ, որ Հայաստանում մեծամասամբ կվերանա ատելության, թշնամանքի խոսքը կվերանա վիրավորանքը, կվերանա զրպարտանքը»:
Զոհրաբյանը նաև ասաց, որ իր դիտարկումները, մտահոգությունները ուղարկել է Վենետիկի հանձնաժողով, Եվրոպայի խորհրդի խորհրդարանական վեհաժողովի մարդու իրավունքների հանձնակատին, ինչպես նաև լրագրողական և իրավապաշտպան կազմակերպությունների:
Հիշեցնենք, որ Ազգային ժողովը մարտի 24-ին երկրորդ ընթերցմամբ և ամբողջությամբ ընդունել է ԱԺ փոխնախագահ Ալեն Սիմոնյանի նախագիծը, որով վիրավորանքի համար նախատեսվում է 3 միլիոն, իսկ զրպարտության համար՝ 6 միլիոն դրամ փոխհատուցում: